رد بالك تنتخب شخص لانك سمعت انه كويس ، او تعرف عيلته ، او لانه محامي او صحفي معروف او اي شيء من هدا القبيل
ياما من ناس من عائلات معروفه و دماغها فاضي ، او محامي كبير لكن فاسد او اعلامي مشهور لكن ما يفهم شي في القانون .
ترشيحك لشخص يعني انك اخترت افضل شخص ينطبق معاك في الافكار و نستأمنه على مهمة انه ينوب عليا في مهمة تمثيلي في كتابة افكاري و رايي في الدستور ، زي ما تعطي لواحد فلوس تقوله هدو فلوس نبيك تشغلهملي ، الراجل واثق في امانته و واثق في امكانية انجازة للمهمة و هي الربح الاقتصادي ، و الا يكون تفكيرك مش سليم لو مش واثق فيه و مع هذا تعطيه الفلوس .
حتى الدستور نفس الشي ، اسأل نفسك في الاول انا شن النقاط اللي مانبيهاش تندار في الدستور او النقاط اللي لازم نبيها تنكتب في الدستور ، نعطيكم امثلة :
- في اللي يقول لازم ان الدستور ينص على ان الدين الاسلامي هو المصدر الوحيد للتشريع
- في اللي يقولك نبي الدستور ينص على قانون واضح للجنسية الليبية ما نبيش كل من هب و دب يكون ليبي
- في اللي يبي لغته القومية تذكر في الدستور و تكون ليها حقوق واضحه و صريحة
- في اللي يبيها دولة ملكية و في اللي يبيها رئاسية و في اللي يبيها ببرلمان و مجلس شيوخ
- من هو الرئيس او الملك وكيف نختاروه و من هو النائب في البرلمان و كيف نختاروه
- صلاحيات الرئيس لوين توصل هل من حقه اعلان الحرب من غير اللجوء لحد هل من حقه يعلن حالة الطوارئ
- الدورة الانتخابية يعني كم مدة ولاية الرئيس او نائب البرلمان او المجالس البلدية و هل يحقلهم يترشحوا اكثر من مرة
- هل يحق لاي شخص متزوجة من اجنبية او امه اجنبية او عنده جنسية مزدوجة ان يكون رئيس او نائب في البرلمان او حتى ذو منصب
- هل التعليم و الصحة مجانيات ام لا
- هل النظام الاداري للدولة فدرالي او محافظات او حتى كومونات
- شن حقوقي انا كمواطن مثلا لا للتجسس عليا ، حوشي ليه حرمته ، ممنوع تفتيشي انا او سيارتي او بيتي الا بامر من النيابة
- العلاقة بين الجهاز التشريعي و التنفيذي و القضائي ، شكون يعين التاني و شكون يقدر يقيل التاني و شن هي الطريقة
الامثلة كثيرة بعضها تهم بعض الناس و بعضها ما تهمش هلبا ناس ، مثلا انا ما تهمنيش نقاط زي اسم الدولة او لون علمها او موضوع حدودها ، كلها شكليات ما تهمنيش قد تهم غيري ، لهدا ما يهمنيش النائب اللي حنختاره شن رايه في الموضوع هدا لكن يهمني رايه في موضوع زي النظام الاداري .
الخلاصة اتعبوا شويا حاول تلقى المعلومة ما يكذبوش عليكم بكلمة ان الانتخاب واجب وطني ، الحقيقة الاختيار الصح هو الواجب الوطني ، هدا مصير وطن اما ان تختار صح او ما تختارش لكن لو سمحت ما تختارش غلط ، اختار اللي يمثلك و يمثل فكرك او على الاقل يمثل اغلب رايك .
عدم الانتخاب افضل من تختار هكي و خلاص.
ليست هناك تعليقات:
إرسال تعليق
بسم الله الرحمن الرحيم ( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )