عن هيكل

استمعت بالامس الى الحلقة قبل الماضية لمحمد حسنين هيكل من برنامجه على قناة CBC مع لميس الحديدي التي تحدث فيها عن ملامح سنة 2014 ، و تصوره و قراءته عن شكل المنطقة و كيف ستكون و معطياتها و تحليل للاوضاع الحالية .


و بعد استماعي لما قاله تاكدت من صحة راي السابق القائل بان اغلب المحليلين خصوصا المصريين و اخص منهم محمد حسنين هيكل لا يدري عن المغرب العربي شيء الا قدر معرفتي باعضاء مجلس الامة الكويتي ، رؤيتهم في ليبيا كالتالي دولة شقيقة و صديقة عربية صحراوية غنية بالنفط ، المنطقة الشرقية من ليبيا هي امتداد لمصر ، و تعاني من مشاكل كبيرة و يجب ان يكون لمصر يد فاعلة في ليبيا و يحبذ لو تدخل الجيش المصري في ليبيا لحل مشاكل ليبيا و لضمان ولاء شعبها لمصر و الاستفاده منها ، طبعا المقصود ليس احتلال بقدر ماهو تدخل مثل تدخل الناتو او تدخل سوريا في لبنان .

هذا ملخص رؤية محمد حسنين هيكل لليبيا و هي نفس وجهة نظر أحمد المسلماني من قبله ، و على ما يبدوا هذه وجهة نظر اصحاب الفكر الناصري  لليبيا.

قد يكون السبب ان نظرياتهم و فكرهم مستقى من زمن الخمسينيات و نما في الستينيات و توقف عند ذاك الحد ، و لم  يتطور او يعاد تقييمه من جديد ، في حين ان الشعب الليبي نما و تطور و تغير و لم يتوقف عند الستينيات ، و تبلورة فكرة الامة الليبية او على الاقل فكرة الاستقلال بالذات عن الكل و لم يعد الشعب الليبي يرى في نفسه تابع مصيره من مصير الغير او له تبعيه لفكر سياسي مستورد من خارج البلاد كالفكر القومي العربي او فكر حزب البعث الاشتراكي او مرشد الاخوان او الحزب الشيوعي ، صحيح ان هذا الشعور لم يختفي من الكل لكن تغيرت النسب مع مر السنين .

يطول الحديث عن هيكل و امثاله كثر لكن لا اريد ان اتعمق اكثر فارتكب نفس خطأه اتكلم فيما لا افقه ، لا احد يستطيع ان يفهم كل شيء و زمن الفلسفة الشاملة زمن افلاطون و ارسطو قد انتهى ، استطيع ان احكم على بلدي لانني اعيش فيها و اتابع اخبارها و مع هذا لم استطع ان افهم المجريات فيها ، فهل يدعي محمد حسنين هيكل انه من زيارة بعض اشراف القبائل وضع تحتها الف خط ، نعلم ماذا تعني اشراف في ليبيا خصوصا بعد زمن القيادات الشعبية الاجتماعية و زمن اصبح فيه ادنى القوم علما و رأيا و عقلا و حكمة مقدما فيهم ، استطاع بهذا ان يكون وجهة نظر عامه و راي حول البلد .

و هذا ما اقصد لازالت النظرة سطحية لليبيا انها صحراء قاحلة تسكنها مجوعة قبائل متناحرة لها نفط كثير و عاصمة اسمها طرابلس ، و لكن و للاسف ليبيا اكثر تعقيدا من هذا و المصالح تتشابك و الايدي اللاعبة داخل ليبيا كثيرة و الاطراف اكثر من عدد القبائل و هناك اكثر من قومية تتصارع داخل ليبيا و ليس النفط فقط هو ورقة الضغط المستخدمة ، و لا اعتقد ان النفط يباع بلا رقيب بهذه السهولة فلازلنا اعضاء في اوبك ، باختصار ليبيا اصبحت اكثر تعقيدا من زمن الاستقلال .

نصائح انتخابية (لهجة ليبية)

رد بالك تنتخب شخص لانك سمعت انه كويس ، او تعرف عيلته ، او لانه محامي او صحفي معروف او اي شيء من هدا القبيل
ياما من ناس من عائلات معروفه و دماغها فاضي ، او محامي كبير لكن  فاسد او اعلامي مشهور لكن ما يفهم شي في القانون .

ترشيحك لشخص يعني انك اخترت افضل شخص ينطبق معاك في الافكار و نستأمنه على مهمة انه ينوب عليا في مهمة تمثيلي في كتابة افكاري و رايي في الدستور ، زي ما تعطي لواحد فلوس تقوله هدو فلوس نبيك تشغلهملي ، الراجل واثق في امانته و واثق في امكانية انجازة للمهمة و هي الربح الاقتصادي ، و الا يكون تفكيرك مش سليم لو مش واثق فيه و مع هذا تعطيه الفلوس .

حتى الدستور نفس الشي ، اسأل نفسك في الاول انا شن النقاط اللي مانبيهاش تندار في الدستور او النقاط اللي لازم نبيها تنكتب في الدستور ، نعطيكم امثلة :
  • في اللي يقول لازم ان الدستور ينص على ان الدين الاسلامي هو المصدر الوحيد للتشريع 
  • في اللي يقولك نبي الدستور ينص على قانون واضح للجنسية الليبية ما نبيش كل من هب و دب يكون ليبي
  • في اللي يبي لغته القومية تذكر في الدستور و تكون ليها حقوق واضحه و صريحة
  • في اللي يبيها دولة ملكية و في اللي يبيها رئاسية و في اللي يبيها ببرلمان و مجلس شيوخ
  • من هو الرئيس او الملك وكيف نختاروه و من هو النائب في البرلمان و كيف نختاروه
  • صلاحيات الرئيس لوين توصل هل من حقه اعلان الحرب من غير اللجوء لحد هل من حقه يعلن حالة الطوارئ
  • الدورة الانتخابية يعني كم مدة ولاية الرئيس او نائب البرلمان او المجالس البلدية و هل يحقلهم يترشحوا اكثر من مرة
  • هل يحق لاي شخص متزوجة من اجنبية او امه اجنبية او عنده جنسية مزدوجة ان يكون رئيس او نائب في البرلمان او حتى ذو منصب
  • هل التعليم و الصحة مجانيات ام لا 
  • هل النظام الاداري للدولة فدرالي او محافظات او حتى كومونات
  • شن حقوقي انا كمواطن مثلا لا للتجسس عليا ، حوشي ليه حرمته ، ممنوع تفتيشي انا او سيارتي او بيتي الا بامر من النيابة
  • العلاقة بين الجهاز التشريعي و التنفيذي و القضائي ، شكون يعين التاني و شكون يقدر يقيل التاني و شن هي الطريقة
الامثلة كثيرة بعضها تهم بعض الناس و بعضها ما تهمش هلبا ناس ، مثلا انا ما تهمنيش نقاط زي اسم الدولة او لون علمها او موضوع حدودها ، كلها شكليات ما تهمنيش قد تهم غيري ، لهدا ما يهمنيش النائب اللي حنختاره شن رايه في الموضوع هدا لكن يهمني رايه في موضوع زي النظام الاداري .

الخلاصة اتعبوا شويا حاول تلقى المعلومة ما يكذبوش عليكم بكلمة ان الانتخاب واجب وطني ، الحقيقة الاختيار الصح هو الواجب الوطني ، هدا مصير وطن اما ان تختار صح او ما تختارش لكن لو سمحت ما تختارش غلط ، اختار اللي يمثلك و يمثل فكرك او على الاقل يمثل اغلب رايك .

عدم الانتخاب افضل من تختار هكي و خلاص.